Mammat skriivaa

Jos mie häätysin skriivata tätä meän murretta (kieltä) joka päivä menis minun hunteerauksetki aivan sekassiin. Kyllä mie tätä raataan minun ruottin kusineitten kansa mutta että häätyis joka päivä raatata, ei tulis tästä login raapustamisestakhan yhtän mithän. Taitas kaikki login fölhjyn hypähneet hypätä poijes ja sitte ei olis yhtän seuraajaa enhän.

Mie häyn kertoa että tuo meän pieni hevonen (se ponimamma) on paisunu ko mahoton. Sen synnyttämistä joutuupi ootella vielä reilut 100 vuorokautta. Mie siittä eilen koetin mahottomassa tuulessa räpsästä jonkusenkhan foton aikaseksi, mutta ehän siittäkhän mithän tullu ko ei se pentele suostunu posseeraahman laisinkhan. Kyllä son mahoton jäärä ja saikkaaki miltei koko ajan narunpääsä jos sielä roikkuu följyssä joku muu ko mie. Häätyy siittä kuitekki laittaa jokunenkhan foto tänne teänlaisile nähtäviksi. Tykkää kua tykkää ja muut on tykkäämättä.

228 vuorokautta

228 vuorokautta

Lumo paimenhurtta oli kuitekki kartanolla pikkusen filmaattisempi mamma kuvattavaksi ko tuo poni. Senki maha on kasunu mutta ei enhän niin paljoa. Ei sieltä montaa pentua ole ootetavissakhan pari kolme pian, onhan se katottu sillä elukkatohtorin ultrakonheela. Lumo se synnyttääki jo tulevalla viikola, laskettu aika olis 26. päivä mutta mie piän että se tekkee ne pikkusen aikasemmin ko ei ole enskerttaa täsä hommassa. Fiini mamma son ja fiiniä pentusia tullee varmasti.

53 vuorokautta

Kävi se pikku hurttaki kylästelemässä menneenä päivänä. Kauheasti kasunu seki, aivan mahoton. Kyllä jääpi katti jo kakkoseksi painissa vaikka on se kattiki kasunu. Kaihti kuitekki päässy kasuahmaan isommaksi ja onhan tuosta tullu nopeampi laukkohmaanki ko katista. Kyllä ne melkosta hippaa laukkova kartanolla siihen asti että katti loikkaa johonki piihloon hurtalta. Kyllä niiton jännä vahata. Penikka on kuvissa 11vk.

Vaan enpä mie taija enhän jaksaa skriivata tätä Meänkieltä, ko en mie etes ossaa tätä sillai oikhein niinkö kuulus kunnolla osata. Mutta ehkä tet saitta tästä jotaki selkoa tai sitte että, mutta ei se haittaa mithän. Tulipa ehkä selväksi sille herhneen nenhän vetäjälle anonyymile jotta jos mie näin skriivaisin jatkuvasti nii ehän tätä kukhan hullukhan jaksas lukea. Solis ko hypätä biihliin ja karhauttaa päin mäntyä. Pääsis iisimmästi ko seurata tätä sekopäistä tekstiä.

Toivotammapa mammojen ja ruunitten kansa kuitekki jokhaisele hauskaa päivän loppua ja fiinejä tulevia päiviä. Piättäkhää lippu ylhäällä ja hyänolon tunne jokkainen ittellänsä!